Baladweeyne,(insidesomalia.org)-Ciidamada Itoobiyaanka ee ku sugan Degmada Baladweeyne ee Gobolka Hiiraan ayaa howlgalo ay dad ku qab qabteen xalay ka fuliyay Degmadaasi.

Ciidamada Itoob ayaa habeenimadii xalay ahaa waxaa ay howlgalo ka sameeyeen Suuqa Huriwaa ee Xaafada Hawlwadaag ee Magaalada Baladweeyne ee Gobolka Hiiraan.

Ciidamadani ayaa inta ay howlgalada ku jireen waxaa ay jabiyeen 3 dukaan oo ku yalay suuqaasi oo ay lahaayeen dad rayid ah, isla markaasina ka kexeeysteen 3 nin oo ay la aadeen fariisimada ay ku leeyihiin Deegaanka Janta kun dishe ee duleedka Degmada Baladweeyn,lamana garanayo sababta ay Ciidamada Itoobiyaanka ragaasi u kexeeysteen.

Sidoo kale waxaa lagu soo waramayay in Ciidamada Itoobiyaanka ay hub ka heleen Dukaan uu lahaa Ganacsade reer Baladweeyne ah,waxaana subaxnimadii hore ee saaka ay Ciidamada Itoobiyaanka isaga bexeen Suuqaasi.

Waqtiyadii ugu danbeeyay waxaa ay Ciidamada Itoobiyaanka bilaabeen in ay howlgalo ka sameeyaan gudaha Magaalada Baladweeyne ee Gobolka Hiiraan, taasi oo hoos u dhigtay Ganacsigii Degmadasi, iyadoo dadku ay cabsi xoogan ka qabaan in waxyeelo ay ka soo gaarto Ciidamada Itoobiyaanka ee xiliyada habeenka ah ku faafa Xaafadaha Magaalada.